25 мар 2016 10:45Тоҷикистон / Иҷтимоӣ

Таҳдиди 5 соли зиндон ба Амонбеков барои “салом аз ДИИШ” ва хабари насби “бомба”

Мақомоти тафтишотии шаҳри Самара алайҳи Хурсанд Амонбеков, шаҳрванди 23-солаи Тоҷикистон бо иттиҳоми хабари бардурӯғ оиди амали террористӣ парвандаи ҷиноӣ боз кардаанд, ки то 5 соли зиндонро пешбинӣ кардааст.

Ба иттилои манбаъ зарари моддии хабари дурӯғи Амонбеков 1 миллион рубли русиро ташкил додаст.

Қаблан мақомоти амният ва пулиси Русия аз боздошти Хурсанд Амонбеков, шаҳрванди 23-солаи Тоҷикистон дар Самара хабар доданд, ки тариқи телефон ба маъмурин аз номи “Давлати исломӣ” салом расонда, аз насби маводи тарканда дар маҷмааи тиҷоратии “Космопорт” хабар додааст.

Амонбеков дар навори бозпурсӣ, ки 28 декабри соли гузашта аз ҷониби мақомоти Русия нашр шудааст, худро зодаи Бадахшони Тоҷикистон муаррифӣ карда, изҳор медорад, ки ба Самара ду ҳафта қабл, назди як духтар омадааст. Ӯ дар навор изҳор медорад, ки нисфирӯзи 25 декабр вориди маҷмааи тиҷоратии “Космопорт” шуда, тариқи рақамҳои 112 ба маъмурини пулис аз насби таҷҳизоти тарканда дар ин маҷмаа хабар додааст: “Гуфтам баъди ним соат дар ин ҷо ҳама чиз ба ҳаво мепарад. Ба шумо салом аз “ДИИШ” ва соли наватон муборак”.

Мақомоти Русия мегӯянд, дар пайи дарёфти иттилоъ ба ҷои ҳодиса кормандони амнияти федералӣ, маъмурини дастаи таъиноти махсус, ҷӯяндаҳои маводи тарканда ва дигар масъулин ҳозир шудаанд: “Аз маҷмаа ҳудуди 3 ҳазор нафар берун бароварда шудааст, аммо зимни санҷиш маводи тарканда дарёфт нагардидааст”.

Ба иттилои манбаъ дар пайи чорабиниҳои оперативӣ муттаҳам дар террори телефонӣ боздошт шуд.

Видеои берунории кормандону мизоҷони "Космопорт" баъди дарёфти хабар дар бораи маводи тарканда: