Фошкорӣ: Чиниҳои Душанбе ширкатҳои офшорӣ кушодаанд
Бар асоси асноди нашркардаи “Авроқи Панама” бархе аз шаҳрвандони хориҷӣ зимни сабти ширкат дар минтақаҳои офшорӣ ҷои зисти худро Тоҷикистон гуфтаанд.
Тибқи ин аснод бештари хориҷиён, ки аз номи Тоҷикистон ширкатҳои офшорӣ кушодаанд, шаҳрвандони Чин мебошанд.
Лонг Феичӣ (Long Feichi), шаҳрванди Чин, ки суроғаашро Тоҷикистон нишон додааст, дар ҷазираҳои Вирҷиния ширкати “Assending Technology co ltd”-ро сабт намудааст, ки аз майи 2007 то ноябри 2011 фаъолият кардааст. Ин ширкат миёнарави ширкати бузурги “ORION HOUSE Survises limited”-и Ҳонг Гонг будааст, ки феълан дар тобеияташ садҳо ширкати офшорӣ дошта, дар соҳаи маъдан, энергетика, технология ва дигар соҳаҳо кор мекунад.
Chu Wei-Hui, шаҳрванди дигари Чин, ки суроғаашро шаҳри Душанбе нишон додааст, ҳамчун саҳмдори ширкати офшории “Famous city interprisese Limited” сабт шудааст. Ин ширкат аз марти соли 2011 то моҳи сентябри соли 2015 фаъолият доштааст. Бар асоси иттилои нашршуда “Famous city interprisese Limited” низ миёнарави ширкати “ORION HOUSE Survises limited” будааст.
Чиао Нан, (Jiao Nan), саҳмдори ширкати “Macforth Industries (N) Limited” суроғаашро шаҳри Душанбе кӯчаи Фарҳод 36 сабт кардааст. Ин ширкат 2 ноябри соли 2010 ба қайд гирифта шуда, то ҳол фаъолият дорад. Суроғаи ҳуқуқии ин ширкат низ Ҳонг Конг сабт шуда, ба содироту воридоти мол аз Чин машғул аст.
Бао Ҷиа Ронг, (Bao Jia Rong), шаҳрванди Чин, ки суроғаашро шаҳри Душанбе, кӯчаи Зарафшон-22 нишон додааст, дар ҷазираҳои Вирҷиния зери унвони “Ekea holdings limited” ширкати офшорӣ доштааст, ки аз 3 апрели 2001 то 3 майи соли 2011 фаъолият кардааст. Ин ширкат ба ҳайси миёнарави ширкати бузург-Cosmos secretaries limited фаъолият кардааст, ки дар Ҳонг Конг ҷойгир буда, дар тобеияташ даҳҳо ширкати офшорӣ дорад.
Дар баробари шаҳрвандони Чинӣ, шаҳрвандони Швейтсария низ суроғаашонро Тоҷикистон гуфта, дар ҷазираҳои Вирҷиния ширкатҳои офшорӣ кушодаанд. Аз ҷумла Катерин Меделейн Мерседал Гейс ва Бернард Мария Филип Гейс, шаҳрвандони Швейтсария бо ҳуқуқи баробари моликият ва меросгузорӣ моҳи августи соли 2014 дар ҷазираҳои Вирҷиния ширкати “Mercer invest company ltd”-ро ба қайд гирифтаанд, ки то ҳол фаъолият дорад. Ин шаҳрвандони Швейтсария суроғаашонро шаҳри Душанбе, кӯчаи Ломоносов 470-2 нишон додаанд. Ширкаташон “Mercer invest company ltd” миёнарави ширкати маъруфи “Helene Methieu Legel consultants” муаррифӣ шудааст, ки дафтараш дар Дубай ҷойгир мебошад. “Helene Methieu Legel consultants” аз маъруфтарин ширкатҳои ҳуқуқии Дубай мебошад, ки ахиран дар пайи фошкориҳои “Авроқи Панама” атрофаш баҳсҳои зиёд бархостанд. Расонаҳои Ғарб ахиран хабар доданд, ки ширкат ба сиёсатмадорҳо, варзишгарон, нашъаҷаллобон ва ширкатҳои нафтӣ барои гурез аз андоз кӯмак кардааст.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |