VIDEO: Шикояти наздикони гуруҳи 10-нафарӣ аз ҳукми Додгоҳи Душанбе
Ибодат Муродова -- модари Шералӣ ва Ҷаҳонгир, ки яке панҷ ва дигаре 30 сол зиндонӣ шудааст, дар сӯҳбат бо хабарнигори “Озодагон” гуфт, ҳардуи писар ва, инчунин, ҳамсараш Салим Муродов, ки барои ду сол равонаи маҳбас гардид, аслан гуноҳе надоранд. Ба қавли хонум Ибодат, “писарони ман ягон гуноҳ надоранд, онҳо танҳо худашонро ҳимоя кардаанд. Писари калониам дар тарабхона нишаста будааст ва бачаи хурдиам ба сари акааш рафта, шоҳиди ҷанг шудааст. Чӣ, ҳамин гуноҳ аст? Бачаи маро дар барқ монда, латту кӯб ва тамоми гуноҳро ба гарданаш бор кардаанд.”
Мусоҳиби мо бовар дорад, афроде, ки дар куштори Сорбону Саъдӣ даст доранд, дар озодӣ ҳастанд. “Чаро Насиму Ҳусейн озод шуданду писарони мо не? Чунки онҳо шиносу пул доранд. Писари калониам - Ҷаҳонгир ҳамин қадар кор кардааст, ки дасту рӯи хунолуди Насимро шустааст. Магар ҳамин гуноҳ аст? Дар вақти мурофиаҳо гуфтанд, ки фармон аз боло шудааст. Ин боло куҷо бошад? Дар боло як Худо ҳасту президент. Президент ҳам ҳақиқатро мехоҳад. Писарам Шералӣ бемор аст. Дар панҷсолагиаш ӯро мошин зада буд. Ҳар замон бемориаш хуруҷ мекунад. Аммо ҳеч кас ба мо бовар намекунад”,-нақл кард ӯ.
Ҷамила Яъқубова, модари Шарафҷони Абдулазиз, узви гуруҳи даҳнафарӣ, ки 18 сол аз озодӣ маҳрум шудааст, мегӯяд, писараш донишҷӯи соли чаҳоруми Донишгоҳи славянии Тоҷикистону Русия буда, дониши хуб доштааст. “Ҳоҷати баргузории мурофиаҳо чӣ буд, агар супориш аз боло бошад? Ҳамаро дар сардии зимистон саргардон карданд, агарчӣ барои гунаҳкор будани писарам ягон далеле наёфтанд”,-афзуд ӯ.
Субҳонқул, падари Тошзода Камолиддин, ки ӯ низ барои 18 сол равонаи зиндон шудааст, дар суҳбат бо мо гуфт, “дар ҳар як мурофиа фарзандони моро барвақт меоварданду намегузоштанд, то наздашон даромада, ақаллан як пиёла об диҳем. Мисли он ки террористҳоро меоранд, ҳамин хел рафтор мекарданд.” Падари Тошзода Камолиддин мегӯяд, яке аз муттаҳамони аслӣ дар қатли Сорбон Музаффарбеков нафаре бо номи Мубориз будааст, ки ҳоло дар фирор қарор доштааст. Ба қавли ӯ, “ҳарчанд дар бораи ӯ дар мурофиаи додгоҳӣ низ гуфта шуд, вале додситону додрас онро ба наари эътибор нагирифтанд.”
Додгоҳи шаҳри Душанбе баъд аз зӯҳри 10 апрел ба баҳси додгоҳии гурӯҳи даҳнафарии муттаҳам ба қатли Сорбон Музаффарбекови 20-сола ва Саъдӣ Сатторови 25-сола нуқта гузошт. Бар асоси қарори додгоҳ, Шералӣ Муродов, ки дар ҳар ду куштор муттаҳам мешавад, ба муҳлати 30 соли зиндони низомаш сахт бо мусодираи амволаш аз озодӣ маҳрум шуд. Ҳамзамон, падари ӯ - Салим Муродов ба хотири ироаи санади тақаллубии тиббӣ, ки гӯиё писараш бемори руҳист, барои 2 сол равонаи зиндон гардид.
Камолиддин Тошзода, Шарафҷони Абдулазиз, Сайфулло Кабутов ба муҳлати 18 - солӣ бо мусодираи молу мулк ва нигоҳ доштан дар колонияи низомаш сахт аз озодӣ маҳрум шуда, Дилшод Наимов барои 5 сол, Ҷаҳонгир Муродов, бародари Шералӣ 5 сол маҳкум ба зиндон шуданд. Аммо Насим Муҳиддинов, яке аз айбдоршавандаҳо аз толор озод шуда, Ҳусейн Ҳамроқуллов ба маблағи 8 ҳазор сомонӣ ва духтур Домуллоҷонов, ки санади тақаллубиро ба хонаводаи Муродовҳо пешниҳод кардааст, ба 16 ҳазор сомонӣ ҷарима шуда, раҳо гардидаанд.
Сорбон Музаффарбеков, муштзани тоҷик, 26 августи соли 2012 дар наздикии тарабхонаи “Бешаи палангон”-и шаҳри Душанбе бо зарби корд захмӣ шуда, баъдан дар бемористон ҷон додааст. Қатли Саъдӣ Сатторови 25-сола моҳи апрели соли 2013 дар тарабхонаи “Шаҳрисабз”-и пойтахт сурат гирифтааст. Дар пайи ин ҳодиса, волидони Саъдӣ Сатторов низ аз Эмомалӣ Раҳмон, раисиҷумҳури Тоҷикистон дархост карданд, то тафтишоти қазияро зери назорати худ бигирад. Волидони ин ҷавони марҳум аз он нигаронӣ карданд, ки гӯиё қотили эҳтимолии фарзандашон аз оилаҳои бонуфузи Тоҷикистон аст ва дар гузашта низ аз ҷавобгарӣ барои чандин ҷиноятҳои вазнин халос шудааст. Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Апрел 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
