Русский  >>  فارسی  >>  Панҷшанбе 8 декабр 2016, 01:15

Абдуллоҳи Раҳнамо: Ҳиндустон ба Осиёи Марказӣ роҳ меҷӯяд

2 июл 2013, 10:46

Дар ҳамоиши серӯзаи байналмилалӣ, ки зери унвони «Масъалаҳои рушд, субот ва амният дар Осиёи Марказӣ» дар маркази иёлати Ҷому ва Кашмири Ҳиндустон ҷараён дорад, беш аз 100 коршинос ва соҳибназар аз кишварҳои ҷаҳон ояндаи равандҳои сиёсӣ, иқтисодӣ ва амниятӣ дар Осиёи Марказиро барасӣ менамоянд. Вазири умури хориҷии Ҳиндустон Салмон Хуршед зимни оғози ҳамоиш изҳор дошт, ки кишвараш дар пайи эҳёи коридорҳои иртиботию транзитӣ бо Осиёи Марказӣ ва Русия буда, дар ин самт корҳои амалиро ба роҳ гузоштааст.

Сардори раёсати сиёсати хориҷии Маркази тадқиқоти стратегии Тоҷикистон Абдуллоҳи Раҳнамо, ки дар ин ҳамоиш ширкат дорад, ба «Озодагон» хабар дод, ки иштироки бевоситаи вазири умури хориҷии Ҳиндустон, сарвазири штати Ҷому ва Кашмир ва дигар мақомоти сиёсӣ ва илмию фарҳангии Ҳиндустон дар ин ҳамоиш нишонгари таваҷҷӯҳи махсуси ин кишвар ба масъалҳои Осиёи Марказӣ мебошад. Оқои Раҳнамо аз ҷумла изҳор дошт, ки дар даҳсолаи охир омӯзиши масъалаҳои Осиёи Марказӣ ба яке аз самтҳои афзалиятноки тадқиқотӣ дар Ҳиндустон табдил ёфта, дар ин кишвар даҳҳо маркази махсуси минтақашиносӣ фаъолият доранд: “Ҳатто аз барномаи ҳамоиш метавон гуфт, ки баъзе аз масъалаҳои Осиёи Марказӣ, ки олимони Ҳинд ахиран ба омӯхтани амиқи он рӯ овардаанд, ҳатто дар худи кишварҳои ин минтақа ҳанӯз дуруст омӯхта нашудааст.”

Ба гуфтаи Абдуллоҳи Раҳнамо, яке аз сабабҳои асосии ин таваҷҷӯҳ дар он дида мешавад, ки тибқи пешбинии коршиносон, Ҳиндустон рушди босуръати худро идома дода, дар даҳсолаҳои оянда на танҳо ҳамчун қудрати минтақавӣ, балки ҳамчун қудрати бонуфӯзи сиёсӣ, иқтисодӣ ва амниятии сатҳи ҷаҳонӣ зуҳур хоҳад кард: “Бинобар ин, таваҷҷӯҳи Ҳиндустон ба Осиёи Марказӣ ҳам ҷанбаи иқтисодӣ ва ҳам ҷанбаи сиёсию геополитикӣ дорад."

Нахуствазири штати Ҷому ва Кашмир дар оғози ин ҳамоиш маҳз бо ишора ба нақши қудратҳои ҷаҳонӣ дар ин минтақа гуфт: «Кишварҳое чун Русия, Амрико ва Чин гумон мекунанд, ки маҳз онҳо ҳуқуқи таъйини вазъият дар Осиёи Марказиро доранд.»

Дар бораи муносибатҳои Тоҷикистону Ҳиндустон сухан гуфта, вазири умури хориҷии Ҳиндустон Салмон Хуршед изҳор доштааст, ки ин кишвар талош дорад, низоми виза бо кишварҳои Осиёи Марказӣ, аз ҷумла, бо Тоҷикистонро содда намуда, барои таҳсили донишҷӯёни тоҷик дар донишгоҳҳои Ҳиндустон шароити беҳтар пешниҳод намояд. Ӯ зимни изҳори ин матлаб дар сӯҳбат бо намояндаи Тоҷикистон дар ҳошияи ҳамоиши мазкур илова намудааст, ки нигоҳи Ҳиндустон ба Тоҷикистон комилан дӯстона буда, ду кишвар ҳам дар сатҳи муносибатҳои дуҷониба ва ҳам дар сатҳи барномаҳо ва лоиҳаҳои минтақавӣ ҳамкории фаъол доранд.

Дар АКС: Вазири умури хориҷии Ҳиндустон Салмон Хуршед ҳангоми суҳбат бо сардори Раёсати сиёсати хориҷии Маркази тадқиқоти стратегии Тоҷикистон Абдуллоҳи Раҳнамо


Шарҳи худро бинависед:

Ном:*
E-Mail:
Матни шарҳ:

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!