Русский  >>  فارسی  >>  Душанбе 5 декабр 2016, 13:33

Интихобот ва қазияи Зайд Саидов -- рӯйдодҳои хотирмони сол

21 декабр 2013, 13:44

Аксари коршиносон мегӯянд, аз ҳама руйдоди хотирмон барояшон дар соли 2013 ин ҳабс шудани Зайд Саидов, вазири саноати пешини Тоҷикистон ва интихоботи президентии кишвар мебошад. Ҳатто бархе аз онҳо аз Зайд Саидов ба унвони симои сол низ ном мебаранд.

Лола Олимова, муҳаррири “IWPR” мегӯяд, "дар хотири ман ду рӯйдоди соли 2013 ҷой мегирад. Яке аз онҳо ҳабси Зайд Саидов ва дигараш пешниҳоди номзади ягонаи ИНИТ, Ойниҳол Бобоназарова. Ҳар дуяш ҳам воқеаҳои сиёсӣ буданд ва агар якумаш ҷомеъаи шаҳрвандиро рӯҳафтода кард, дуюмаш нишон дод, ки ҷомеаи шаҳрвандӣ ин қувва аст ва захираҳои хубе ҳам дорад."

Абдураҳмон Хонов, вакили парлумон:

Паёми моҳи апрели президенти Тоҷикистон ба парламент, ки аз ҳама чизи ҷолиби баёнгаштааш ҳадафҳо ва самтҳои асосии марҳилаи имрӯзаи рушди давлатдории миллӣ буд. Ин марҳилаҳо 7 самтро фаро мегирифт ва ояндаи моро дар марҳилаҳои минбаъда муайян менамуд, ки дар оянда мо кадом самтҳоро интихоб намудаем. Аз ҳама муҳимтаринаш ин сиёсати руй овардан ба ҷавонон буд. Чун дар тамоми дунё ҷавонон ба унвони як қувваи бунёдкору созанда эътироф шудаанд. Чизи дигари ҷолиб ин мулоқоти навбатии президент бо ҷавонон буд, ки аз мулоқотҳои қаблӣ тафовут дошт. Чун агар дар вохӯриҳои қаблӣ масъалаҳои ҷузъиро матраҳ мекардем, алакай дар марҳилаи имрӯзаи рушди давлатдорӣ бисёр масоили муҳимро баррасӣ кардем.

Руйдоди хотирмони дигар дар соли 2013 ин интихоботи президенти Тоҷикистон буд. Сарфи назар аз андешаҳои гуногун дар бораи интихобот ман ҳис кардам, ки фарҳанги сиёсии мардуми мо хеле рушд кардааст. Ман шоҳидам, ки дар ҳавзаҳои интихоботӣ мардум навбат меистоданд, то раъйи худро диҳанд. Чизи дигари хотирамон барои ман ин иштирокам дар конфронси байналмилалии парламентарҳои ҷавон буд, ки дар шаҳри Токиои Ҷопон баргузор гардид. Ин конфронс нишон дод, ки тамоми парламентарҳои дунё ба масоили ҷавонон таваҷҷӯҳ мекунанд ва парламентҳо кӯшиш мекунанд, ки намояндагонии ҷавонро ба парлумон ҷиҳати ҳифзи манофеи ҷавонон ворид намоянд. Ман ҳамчун ҷавонтарин вакил хеле хушбахтам, ки дар парлумон фаъолият дорам ва ҳамеша дар фаъолияти вакилии худ кӯшиш мекунам, то ниёзҳои ҷавонон дар қонунгузориҳои мо инъикос ёбад.

Зубайдуллоҳи Розиқ, узви Шӯрои сиёсии ҲНИТ:

Барои ман аз ҳама бештар хотирмон ин ҷашни 40 солагии ҲНИТ буд. Чизи дигари ёдмон бароямон ин буд, ки як рисолаи таълифшудаамон ба чоп расид. Ин бори дуввум аст, ки рисолаи банда бознашр мешавад. Он ҳам дар бораи таърихи ҲНИТ буд. Баъд аз инҳо интихоботи президентӣ хотирмон буд. Муҳимтаринаш дигар ҳаминҳо ҳастанд.

Абдуҳалим Ғаффоров, раиси ҲСТ:

Масъалаи хотирмон интихоботи президентии Тоҷикистон буд, ки ман ҳамчун номзад ба мақоми президентӣ пешбарӣ шудам. Масъалаи дигари соли 2013, ин дароз шудани раводиди буду боши муҳоҷирони меҳнатии тоҷик буд, ки ба муддати 15 рӯз афзоиш ёфт ва яке аз масъалаҳои муҳимтарин ба шумор меравад. Дигар масъалае, ки дар хотири мо боқӣ мондааст, ин обод кардани роҳи байни Айниву Панҷакент мебошад, ки ин низ барои мардуми водии Зарафшон яке аз воқеаҳои хуб ба шумор меравад. Дар имсол пешгӯӣ карда буданд, ки соли мор соли бисёр сангин ва хавфнок мешавад, вале ин сол хушбахтона барои мардуми Тоҷикистон як соли пурбору пурбарор омад, ки барои беҳтару хубтар кардани дараҷаи иҷтимоии халқ худи мардум дар бисёр масъалаҳо саҳм гузоштанд. Хуб мешуд, ки масоили бунёди корхонаҳои хурд барои таъмини ҷавонони кишвар бо ҷои кор амалӣ мегардид.

Ойниҳол Бобоназарова, раиси созмони ҷамъиятии “Перспектива+”:

Бояд бигӯям, ки дар ин сол ҳабси Зайд Саидов на танҳо дар хотири ман, балки дар зеҳни бисёриҳо нақш баст. Албатта, дуюмаш ин интихоботи гузашта аст. Чизи дигаре дар ёдам намондааст.

Хуршеди Атовуллоҳ, сармуҳаррири “Фараж”:

Ҳабси Зайд Саидов сархати ҳама хабарҳои соли 2013 буд ва ҳатто метавон ӯро бегуфтугӯ симои сол номид.

Фаррух Умаров, масъули МТС:

Асосан ҳодисаҳои Хоруғ хотирамон буданд. Чун дар шароити хеле ҳассоси минтақа ва умуман сарҳадоти кишвар ҳаводиси Хоруғ метавонистанд, ки авзоъро мутазалзил кунанд. Вале бо таваҷҷӯҳ ба таҷрибаи гузашта ҳукумати кишвар тавонист, вазъиятро ба эътидол оварад ва ҳаёти осоиштаи мардуми Бадахшон ва тамоми Тоҷикистонро таъмин созад.


Шарҳи худро бинависед:

Ном:*
E-Mail:
Матни шарҳ:
Посух додан
  • Хакгу

  • 23 декабр 2013 07:58
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
"пешгӯӣ карда буданд, ки соли мор соли бисёр сангин ва хавфнок мешавад, вале ин сол хушбахтона барои мардуми Тоҷикистон як соли пурбору пурбарор омад" Эй акай Абдухалим Боши!!!!

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!