Муносибат бо Русия ва дархости лағви виза миёни кишварҳои Осиёи Марказӣ
Тоҷикистон хостори равуои озоди нақлиёт ва одамон миёни кишварҳои Осиёи Марказӣ буда, тарафдори лағви низоми раводид ё виза мебошад. Ин ҳарфҳоро Эмомалӣ Раҳмон, раисиҷумҳури Тоҷикистон, рӯзи 23 апрел ҳангоми ироаи паёми солонааш дар Душанбе баён дошт.
Феълан аз миёни кишварҳои Осиёи Марказӣ Узбакистону Туркманистон бо Тоҷикистон низоми раводид доранд. Равуо ба Қирғизистону Қазоқистон озод аст.
Оқои Раҳмон гуфт, “ҳақиқат мусаллам аст, ки мардуми Осиёи Марказӣ дар якҷоягӣ ҳама мушкилотро ҳал мекунанду якҷоя зидди ҳаргуна таҳдид истодагарӣ.” Президент Раҳмон афзуд, дар оянда низ Тоҷикистон ба анъанаву ҳамзистии мардуми Осиёи Марказӣ эҳтиром гузошта, аз дахолат ба умури дохилии кишварҳои ҳамсоя дурӣ меҷӯяд.
Дар идома ӯ муносибати Тоҷикистон бо Русия ва Амрикову Чинро шарҳ дода, аз ҷумла гуфт, “агарчӣ сатҳу мӯҳтавои равобит ва дараҷаи тарафҳоро бо Русия хеле баланд менамоем, бо ин кишвар амиқтар намудани равобити иқтисодиву сиёсӣ, низомӣ ва техникӣ аз афзалятҳои сиёсати хориҷии мо ҳаст ва хоҳад монд. Мо аз сатҳи баланди ҳамкориҳо бо Чин қаноатманд ҳастем. Ҳавасанди густариши ҳамкорӣ бо Амрико ва Иттиҳоди Аврупо мебошем, ки онҳо дар сиёсату иқтосди ҷаҳон нуфуз доранд.”
Дар охир Эмомалӣ Раҳмон тартиби Консепсияи нави сиёсати хориҷии Тоҷикистонро тақозои замон донист.
Мӯҳр