25 май 2015 14:01Тоҷикистон / Иҷтимоӣ

Қарори додгоҳ: Сарраёсат ба Шаҳбол 117 ҳазор сомонӣ пардохт кунад (ВИДЕО)

Зебуниссо Саидова, додраси Додгоҳи низомии гарнизони шаҳри Душанбе имрӯз, 25-уми май қарор кард, ки Сарраёсати қушунҳои сарҳадии Кумитаи давлатии амнияти миллӣ ба хонаводаи Шаҳбол Мирзоев, сарбози латукӯбшудаи тоҷик 117 ҳазор сомонӣ ҷуброни зарари моддию маънавӣ пардохт кунад.

Додгоҳ қарор кард, ки Сарраёсат ба хонаводаи Шаҳбол 97 ҳазору 265 сомонию 37 дирам ҷуброни зарари моддӣ ва 20 ҳазор сомонӣ ҷуброни зарари маънавӣ пардохт кунад. Ин дар ҳолест, ки хонаводаи Шаҳбол Мирзоев аз Сарраёсати қушунҳои сарҳадии Кумитаи давлатии амнияти миллӣ 180 ҳазор сомонӣ ҷуброни зарари маънавӣ ва 97 ҳазору 265 сомонию 37 дирам ҷуброни зарари моддӣ талаб карда буд.

Айбдоркунандаи давлатӣ дар мурофиаи додгоҳии хонаводаи Шаҳбол Мирзоев, сарбози латукӯбшудаи тоҷик, алайҳи Сарраёсати қушунҳои сарҳадии Кумитаи амният аз иддаои хонаводаи Шаҳбол ҳимоят кард.

Тавре хабарнигори “Озодагон” имрӯз, 25-уми май аз рафти мурофиа дар Додгоҳи низомии гарнизони шаҳри Душанбе иттилоъ дод, айбдоркунандаи давлатӣ изҳор дошт, ки зимни мурофиа иддаои хонаводаи Мирзоевҳо дар мавриди зарари моддию маънавӣ тасдиқи худро ёфтанд. Айбдоркунандаи давлатӣ аз Зебунисо Саидова, раисикунандаи мурофиа дархост намудааст, ки даъвои хонаводаи Шаҳбол Мирзоев дар мавриди ҷуброни зарари моддию маънавӣ қисман қонеъ карда шавад. Аммо ӯ шарҳ надод, ки барои чӣ даъвои Мирзоевҳо пурра не, балки қисман қонеъ гардад.

Аммо ҷониби Сарраёсати қушунҳои сарҳадии Кумитаи амният дар сухани ниҳоияш аз додрас хост, парванда барои ҷуброни зарари моддию маънавӣ қатъ карда шавад, чун Сарраёсат тамоми хароҷоти табобати Шаҳболро дар беморхонаи Қарияи Боло пардохт намуда, ҳамаи уҳдадориҳояшро нисбати ин қазия иҷро кардааст. Намояндаи Сарраёсат илова намуд, ки дар расонидани зарари моддӣ ва маънавӣ ба Шаҳбол - куҳнасарбоз Усмоналӣ Ғайратов ва Гулрухсор Ширинова, навбатдори нуқтаи тиббии қисми низомии 2620 гунаҳкоранд ва маҳз онҳо бояд дубора ба ҷавобгарӣ ҷалб шаванду ҷубронро пардохт кунанд.

Шаҳбол Мирзоеви 23-сола, сокини деҳаи Понғози ноҳияи Ашт ва фориғуттаҳсили Донишгоҳи ҳуқуқ ва тиҷорати шаҳри Хуҷанд, соли гузашта довталабона ба хидмати низомӣ рафта буд. Ӯ шоми 8 марти соли 2014 аз сӯи ҳамхидматаш дар қисми ҳарбии марзбонии 2620 мавриди латту кӯби шадид қарор гирифта, сутунмуҳрааш мешиканад. Додситонии низомии гарнизони шаҳри Душанбе низ баъд аз таҳқиқи ин қазия эълон карда буд, “гардани Шаҳбол Мирзоев дар натиҷаи маҷбуран гуштӣ гирондани ӯ бо кӯҳнасарбоз - Усмоналӣ Ғайратов шикастааст”.

19 июни соли сипаришуда Додгоҳи ҳарбии гарнизони Душанбе Усмоналӣ Ғайратовро дар латту кӯби Шаҳбол Мирзоев гунаҳкор дониста, нуҳ сол аз озодӣ маҳрум кард. Бар асоси ҳукми додгоҳ, Гулрухсор Ширинова -- навбатдори нуқтаи тиббии қисми низомии 2620 низ муҷрим шинохта шуда, даҳ дарсади маоши яксолааш ба фоидаи давлат рӯёнда хоҳад шуд.

Мӯҳр

Хабарҳои монанд: