30 июл 2015 15:31Тоҷикистон / Ҷавонон ва варзиш

АКС: Калиди мошин ба Шакармаҳмад ва теннисбозии президент дар маҷмааи нави Хоруғ

Эмомалӣ Раҳмон, раисиҷумҳури Тоҷикистон имрӯз, 30 июл, дар доираи сафраш ба Бадахшон, дар маҳаллаи Носири Хусрави шаҳри Хоруғ як маҷмааи варзиширо, ки барои 1700 ҷойи нишаст пешбинӣ шудааст, ифтитоҳ намуд.

Тибқи иттилои дафтари матбуоти раисиҷумҳур, барои сохтмони ин иншоот, ки масоҳати умумии он зиёда аз 1 гектарро ташкил медиҳад, беш аз 17 миллион сомонӣ аз ҳисоби буҷети давлат сарф шудааст. Манбаъ мегӯяд, ин иншоот дорои толори калон, толорҳои хурд, комплекси барқароркунии саломатӣ ва варзиш, тайёрӣ ва омодагии дастаҳои яккачини вилоят барои иштирок дар мусобиқаҳо, чемпионатҳои ҷумҳуриявию байналмилалӣ, утоқҳои корӣ ва мехмонхона мебошад.

Ба иттилои манбаъ, бо бунёди ин маҷмааи варзишӣ ба варзишгарони Бадахшон имкон фароҳам оварда шуд, ки тамоми фасли сол мусобиқаҳои вилоятӣ, ҷумҳуриявӣ ва сатҳи байналмилалиро дар он гузаронанд.

Дафтари матбуоти раисиҷумҳур афзуд, Эмомалӣ Раҳмон ҳангоми боздид аз ин маҷмааи варзишӣ бо варзишгарони наврас теннисбозӣ кард ва дар ракеткаи яке аз бозингарони наврас барои хотира соядаст гузошт: “Дар толори фитнес, ки асосан дар он ҷавондухтарон ба тамрин машғул буданд, сарвари давлат онҳоро ба машқи пайваста ва ба воситаи варзиш солим нигоҳ доштани бадан ҳидоят кард. Зикр карда шуд, ки машғулияти варзишӣ барои занон хеле муфид мебошад”.

Эмомалӣ Раҳмон зимни шиносоӣ бо шароити варзишгоҳ ба кормандони Дирексияи сохтмони иншооти ҳукуматии Дастгоҳи иҷроияи Тоҷикистон барои иҷрои босифат ва пурраи корҳо ва ба раёсати Кумитаи ҷавонон, варзиш ва сайёҳӣ барои дастрас кардани таҷҳизоти муосири машқу тамрин дастуру супоришҳо додааст.

Раисиҷумҳури кишвар иброз доштааст, ки ҳукумати кишвар ба рушди таълими варзишӣ таваҷҷуҳи махсус зоҳир намуда, ҷиҳати такмили фаъолияти мактабҳои варзишӣ чораандешӣ менамояд: “Қобили зикр аст, ки дар 10 мактаби варзишии вилоят ҳамарӯза 3045 нафар варзишгар, аз ҷумла 607 духтар дар 289 гурӯҳ тамрин менамоянд, ки ба онҳо 189 мураббӣ дарс медиҳанд”.

Ба иттилои манбаъ, дар ҳузури Эмомалӣ Раҳмон қувваозмоии финалии паҳлавонон дар мусобиқаи кушоди ҷумҳуриявӣ аз рӯйи куштии миллӣ баргузор шуда, барои ҷоизаи олӣ - автомошинаи сабукрав, ки аз ҷониби Президент таъсис дода шуда буд, варзишгарон аз дастаи вилояти Бадахшон Рауф Зиёбеков ва Шакармаҳмад Мирмаҳмадов мубориза бурдаанд. Манбаъ мегӯяд, танҳо бо бартарияти бештари имтиёзҳо Шакармаҳмад Мирмаҳмадов бар ҳарифаш пирузӣ ба даст оварда, калиди автомобилро Эмомалӣ Раҳмон ба ӯ тақдим намудааст. Дафтари матбуоти раисиҷумҳур мегӯяд, дар навбати худ варзишгарон ба Эмомалӣ Раҳмон кеманои куштигириро туҳфа намуданд.