31 июл 2015 08:16Тоҷикистон / Сиёсат

Муҷозоти мансабдори Кумитаи идораи замин барои баррасӣ накардани муроҷиати шаҳрвандон

Додгоҳи ноҳияи Исмоили Сомонии шаҳри Душанбе як мансабдори Кумитаи идораи замини шаҳри Душанберо барои сари вақт баррасӣ накардани муроҷиати шаҳрвандон муҷозот кардааст.

Тибқи иттилои ин ниҳод, Шоев И.Б, муовини раиси Кумитаи идораи замини Душанбе ҳангоми иҷрои вазифаҳои ба уҳдаашбуда, талаботи моддаи 12-и қонун “Дар бораи муроҷиати шаҳрвандон”-ро сарфи назар ва “ба вазифаҳои хизматии худ хунукназарона рафтор намуда, муроҷиати сокинонро сари вақт баррасӣ накардааст”.

Манбаъ мегӯяд, ин масъули Идораи замини шаҳри Душанбе дар чанд ҳолат тартибу муҳлати баррасии муроҷиатҳои шаҳрвандонро риоя накардааст: “Яъне, муроҷиати шаҳрванд Абдуллоев А.Р. оиди эътирофи соҳибмулкӣ ба манзили истиқоматӣ санаи 5 майи соли 2015 барои баррасӣ ба муовини раиси Кумитаи идораи замини шаҳри Душанбе вогузор шудааст. Аммо Шоев И. бархилофи талаботи Қонуни Ҷумҳурии Тоҷикистон “Дар бораи муроҷиати шаҳрвандон” амал карда, дар муҳлати зиёда аз як моҳ баррасии аризаи зикргардидаро таъмин накардааст. Инчунин, муроҷиати шаҳрвандон Каримов К., Муродова Г., Саидов Н. ва Соатова З.-ро, ки ба Шоев И. барои баррасӣ санаи 4 майи соли 2015 вогузор карда шудаанд, низ муддати зиёда аз як моҳ мавриди баррасӣ карор надода, ба муроҷиаткунандагон ҷавоб нагардонидааст”.

Дар ҳоле, ки ба гуфтаи Додгоҳи Исмоили Сомонӣ тибқи моддаи 12-и қонун ”Дар бораи муроҷиатҳои шаҳвандон”, муроҷиатҳо дар муҳлати то як моҳ аз рӯзи расиданашон, вале муроҷиатҳое, ки омӯзишу таҳқиқи иловагиро талаб намекунанд, давоми 15 рӯз бояд баррасӣ шаванд.

Манбаъ мегӯяд, муовини раиси Кумитаи идораи замини Душанбе бо дастрасии моддаи 87-и Кодекси ҳуқуқвайронкунии маъмурӣ гунаҳгор дониста шуда, ба ӯ ҷазо дар намуди ҷарима ба андозаи 30 нишондиҳанда барои ҳисобҳо ё 1200 сомонӣ ба фоидаи давлат таъин карда шуд.

Мӯҳр

Хабарҳои монанд: