35 кило маводи мухаддир кашф шуд, аммо соҳибаш аз маҳалли ҳодиса фирор кард

Аснои баргузории як амалиёти вижаи кормандони милиса дар ҳудуди шаҳри Қӯрғонтеппа миқдори зиёди маводи мухаддир забту мусодира гардид.

---

Тавре ба хабаргузории «Озодагон» аз дафтари матбуотии ВКД иттилоъ доданд, рӯзи гузашта дар хиёбони Айнии ин шаҳр автомашинаи тамғаи «Опел Астра», ки ба шаҳрванд Муҳаммад Гулмадови 26- сола, сокини ноҳияи Шӯрообод, деҳаи  Дараи Об тааллуқ дорад, мавриди тафтиш қарор гирифт.

Манбаъ афзуд, аммо сарнишини нақлиёт ба фармони кормандони дастаи таъиноти махсуси милисаи вилояти Хатлон итоат накарда, суръати мошинро зиёд карда, аз маҳалли тафтиш фирор намуд. Ронанда дар гардиши кӯчаи  Айнӣ-Ғафуров аз ӯҳдаи идораи нақлиёт набаромада, автамашинаро чаппа карда, аз ҷойи ҳодиса ғайб задааст. Ҳангоми азназаргузаронии автомашина аз бағоҷаш 35 килою 10 грамм маводи нашъадори навъи «бангдона» дарёфт ва мусодира карда шуд. Феълан, барои дастгир кардани ронанда Муҳаммад Гулмадов чораҳои фаврӣ- ҷустуҷӯӣ идома дорад.

Мӯҳр