Тоҷикистандарт: Фурӯшгоҳҳоро аз тарозӯҳои корношоям тоза мекунем

Масъулини агентии Тоҷикстандарт 4 ҳазору 710 адад воситаҳои ченаки  корношоям ва таъмирталабро ошкор намуда, аз истифода берун карданд.

Аз агентии мазкур ба Озодагон иттилоъ доданд, ки соли равон дар натиҷаи назорати давлатии метрологӣ дар 839 корхонаву муассиссаҳои кишвар 53 ҳазору 656 адад воситаҳои ченак зери санҷиш қарор гирифтааст. Аз ин шумора беш аз 8 дар сади он бо сабаби мӯҳлати санҷишашон гузаштан ва ё таъмирталаб будан корношоям ҳисобида шудаанд: “Миқдори воситаҳои ченаки корношоям низ нисбат ба ҳамин давраи соли 2011 тақрибан 1,5% кам гардид. Давоми семоҳаи аввали соли 2012 дар озмоишгоҳҳои метрологии Тоҷикстандарт 83 ҳазору 970 адад воситаи ченак аз санҷиши мутобиқат гузаштанд, ки дар таносуб бо ин давраи соли гузашта 10516 адад зиёд мебошад”. Манбаъ мегӯяд, аз ин шумора 34 ҳазору 157 ададашро воситаҳои ченаки ҳангоми баҳисобгирии захираҳои сӯзишворию энергетикӣ истифодашаванда ташкил медиҳанд. “Дар хусуси дуруст нишон надодани воситаҳои ченак зимни хариду фурӯши маҳсулот дар бархе аз бозору мағоза ва корхонаҳо низ шикояти баъзе муштариён вуҷуд дорад ва яке аз мақсадҳои гузаронидани назорати давлатӣ низ тоза намудани фурӯшгоҳҳо аз ин намуди воситаҳои ченаки корношоям мебошад”,-афзуд сарчашмаи хабар.

 

 

 

 

Мӯҳр