Роҳандозии як амалиёти бисёрзинаии махсус аз ҷониби кормандони АНМН муҷиби мусодираи 44 кило афюн шуд.
Амалиёти мазкур аз се марҳила иборат буд ва ҳадаф дошт боз як роҳи интиқоли ғайриқонунии нашъаро аз тариқи ҷумҳуриҳои Осиёи Марказӣ ба Федератсияи Русия масдуд созад. Бобоҷон Шафиев, корманди Агентии мазкур дар сӯҳбат бо Озодагон гуфт: «Чанд моҳ пеш кормандони Агентӣ ба ҳуҷҷатикунонии фаъолиятҳои пинҳонии як гурӯҳи муташаккили ҷинояткор оғоз карданд, ки чанд нафар сокинони ноҳияҳои тобеъи ҷумҳурӣ ба ҳайати он шомил буданд. Аъзои ин гурӯҳ миқдори бағоят калони маводи мухаддирро мехост ба қаламрави Русия интиқол диҳанд».
Зимнан, дар ҳудуди шаҳри Хуҷанд ду сокини ноҳияҳои номбурда, ки яке 46 ва дуюмӣ 48 сол дошт, бо халтаи мухаддир боздошт шуданд ва лабораторияи ташхиси судӣ 27 кило афюн будани онро тайид карда буд. Дар нахустин рӯзи ин боздошт маълум шуд, ки ин ду нафар боз шарикони дигар низ доранд, ки дар айни замон бо онҳо нестанд.
Ин буд, ки идомаи амалиёти шиносоӣ ва боздошти онҳо дар қаламрави шаҳри Душанбе ва ноҳияҳои атрофи он оғоз гардид. Баъди таҳқиқу пурсиш мушаххас шуд, ки яке аз он шарикон, шаҳрванди 38-солаи ноҳияи Ваҳдат будааст: «Ҳангоми боздошт ва кофтуков дар хонаи ӯ бо кӯмаки саги хидматӣ дар пинҳонгоҳи махсус омодакарда шуда, 18 баста маводи навъи афюн кашф ва мусодира гардид, ки вазни умумии он тибқи хулосаи лабораторияи ташхиси судӣ 17 кило буд».
Маврид ба ёдоварист, ки ин се боздоштшуда аллакай қаблан барои содир намудани ҷиноятҳои марбут ба нашъа суд шуда будаанд. Вале баъди баромадан аз зиндон боз бо ҳамон пайроҳа рафтаанд.
Мӯҳр