Кашфу мусодираи 420 кило нашъа. Кушта шудани «Сафири Роғӣ»

Аснои як амалиёти муштараки мақомоти интизомии Тоҷикистон ва Афғонистон, ин миқдор маводи мухаддир мусодира гардидааст.

Тавре ба хабаргузории Озодагон аз Агентии назорат аз болои маводи нашъадори кишвар иттилоъ доданд, дар ин бора Бозмуҳаммад Аҳмадӣ, муовини вазири умури дохилаи Афғонистон дар як нишасти хабарии созмонёфта дар Кобул иброз доштааст.Ба гуфти ӯ, ин як амалиёти бузургмиқёс ва пурсамаре мебошад, тайи чанд соли охир дар минтақаи марзӣ анҷом шудааст: “Мо амалиётро ҳамзамон дар қаламрави ду кишвар бо ҳамоҳангӣ бо якдигар тибқи он созише оғоз кардем, ки бо хадамоти зиддимухаддиротии Тоҷикистон имзо карда будем”.

Бино ба гуфтаи ҷаноби Аҳмадӣ, Раёсати СММ оид ба маводи мухаддир ва ҷинояткорӣ амалиёти мазкурро як ташаббуси муҳим ва комёбии бузург дар роҳи мубориза бо қочоқи маводи мухаддир дар ин ду кишвари ҳамсоя арзёбӣ кардааст.  

Тибқи иттилоъ, дар ҷараёни амалиёт 13 қочоқчии нашъа боздошт шуданд. Ҳатто иддае аз афроди дастгиршуда ба содир намудани ҷиноятҳои дигар, аз ҷумла одамрабоӣ ва тиҷорати инсон низ муттаҳам дониста мешаванд. Аз ҷумла, ҳангоми кофтукови манзили зисти боздоштшудагон ду зан аз ҷумлаи шаҳрвандони Тоҷикистон, ки яке 25 ва дуюмӣ 22-сола буданд, ошкор гардиданд, ки бо худ ҳеч асноди мушаххаскунандаи шахсият надоштанд ва дида мешуд, ки эҳтимолан рабуда шуда буданд. Ин ду тан баъди мушаххас кардани ҳуввият ва ҳолатҳои убурашон аз марзи давлатии ду кишвар ба консулгарии Тоҷикистон дар шаҳри Файзобод супурда шуданд, ки дар наздиктарин фурсат қарор аст истирдод шаванд.

Ҳамчунин, дар ҷараёни баргузории амалиёт шаш тан аз кормандони пулиси Афғонистон захмӣ шуданд, ки яке аз онҳо аз ҷароҳати сангин дар ҷои ҳодиса ҷон дод. Зимни амалиёт аз кушта шудани бародари Сафиулло – Файзулло, писари Ҳоҷӣ Идрис, ки дар Афғонистгон бо тахаллуси “Сафири Роғӣ” машҳур аст, низ хабар дода мешавад.

Мӯҳр