Русский  >>  فارسی  >>  Якшанбе 4 декабр 2016, 11:03

«Маняк» барои роҳрӯбон ва ё истиқболи русҳо аз фашизм

8 июн 2012, 11:41

Чандест гуфтугузор дар мавзӯи қатли роҳрӯбони Маскав аз ҳисоби мардумони Осиёи Марказӣ сару садоҳоро дар ин шаҳр ба бор овардааст. Қисмате ҳатто аз пайдо шудани қотили «маняк» дар ин шаҳр, ки танҳо роҳрӯбону кормандони соҳаи коммуналии сиёҳсарро қатл мекунад, ҳарф мезананд. Ин дар ҳолест, ки аллакай масъулони соҳа дар пайи чанд куштори ахиру захмӣ шудани роҳрӯбони Осиёи Марказӣ аз мутааллиқ будани ин бечораҳо ба ин сохтор инкор мекунанд. Ҳарчанд роҳрӯбони дигар аллакай чанд ҳамкори худро савори аспи оҳанини тобут ба ватан фиристодаанд, аммо мақомоти пулис низ ба даҳон об гирифта аз додани маълумот дар ин бора худдорӣ мекунад ва ҳатто «мегурезанд».

Тибқи иттилои сомонаи islamnews.ru, Валерий Бузовикин, ягона масъули пулиси Минтақаи ҷануби Маскав (қатли сил-силавии роҳрӯбон маҳз дар минтақаи мазкур ба вуқӯъ пайвастааст), ки вазифааш пешниҳоди маълумот дар ин бора аст, телефонҳои худро хомӯш кардааст. Кормандони дигари ин шӯъбаи пулис ҳам ҳамеша мегӯянд, ки Бузовикин «дар ҷои кор нест».
Хабаргузориҳо менависанд, дар пайи як ҳуҷум болои роҳрӯбон-муҳоҷирин аз Осиёи Марказӣ дар ин минтақа танҳо дар як шаб 3 нафар ҷароҳат бардошта, як каси дигар ба ҳалокат расидааст. Ҳуҷум бар сари роҳрӯбон, ки таги пои ин «бародарони калон»-и худро руфта тоза  мекунанд, субҳи барвақт сурат гирифтааст. Замоне, ки дигарон хобанду роҳрубон ба тоза кардани ифлосиҳо машғуланд. Ифлосиҳое, ки мардуми таҳҷоӣ мекунанд...

Роҳруби аввал, ки ҷароҳатҳои зиёд бардошта будааст, дар роҳ ба сӯи бемористон фавтидааст. Дар як фосилаи андак аз ин минтақа боз 3 нафари дигар бо ҷароҳатҳо аз зарби корд ба бемористон интиқол шуданд. Тавре ба мо маълум гардид, ҳамаи ин 4 нафар дар як манзили иҷора мезистаанд ва дар назди ҳамон бинои иқоматашон мавриди ҳамла қарор гирифтаанд. Вақте хостем аз роҳрӯбони дигари ин минтақа шарҳи ҳол пурсем илтимосу тавалло карданд, ки беҳтар аст дар ин мавзӯъ сӯҳбат накунанд. Маълум буд, ки зиёд дар ҳарос афтодаанд.

Дар ҳамин ҳол «Российская газета» истинодан ба сарчашмаи худ навиштааст, ки аллакай нисбати ин ҳодиса парвандаи ҷиноӣ боз шудааст. Гуфта мешавад, дар сурати пайдо кардани қотил ва собит шудани гуноҳаш, ӯро то 15 соли маҳрумият аз озодӣ таҳдид мекунад. Бале, агар пайдо намоянд ва умуман агар хоҳиши пайдо намудан дошта бошанд...
Аммо ин нашрия иловатан навиштааст, ки ҳамла бар сари роҳрӯбон дар пайи як низои роҳрӯбон ва «шахси номаълум» сурат гирифтааст.

«Лайф нюс» бошад, гуфтааст, ки ҳамаи ҷароҳатбардоштаҳо роҳрӯбоне будаанд, ки дар ширкати «Юг сервис» кор мекардаанд. Аммо дар ин ширкат оҷилан аз ин роҳрӯбон «халос шудаанд» ва масъулин ба суоли хабаргузориҳо гуфтаанд, ки осебдидагон ба онҳо мутааллиқ нестанд ва бар сари онҳо чӣ меояд, парвое надоранд.
Дар ҳамин ҳол дар пулиси минтақа далели пайдо шудани «қотили маняк»-ро тасдиқ ва инкор накарданд ва гуфтаанд дар ин хусус танҳо Бузовкини тамоми ҳафта «нопайдо» метавонад чизе бигӯяд.

Вячеслав Бубик, сарвари идораи коммуналии минтақаи мазкур ба IslamNews гуфтааст, ин роҳрӯбон ягон алоқамандие ба корхонаи онҳо надоранд ва умуман аз ҳисоби роҳрӯбони «ӯ» касе мавриди ҳамла қарор нагирифтааст. «Дар ҳамин минтақа ӯзбакҳо манзилеро иҷора мегиранд ва аммо онҳо роҳрӯб нестанд, ҳамаи онҳо дар бозор ба савдогарӣ машғуланд. Миёни ҷароҳатбардоштагон ва кушташудагон ягон роҳрӯби мо нестанд. Мо фавран роҳрӯбони худро хабар гирифтем, онҳоро ҳисоб кардем, ҳамаашон зиндаву саломатанд ва касе дар ин бора чизе намедонад», - гуфтааст Бубилик.

Мардуми маҳалӣ бошад, бар онанд, ки борҳо ба пулис оид ба вайрон кардани тартиботи зист аз сӯи ӯзбакон шикоят кардаанд ва баъди чора наандешидани мақомот «мардум худашон чораи онҳоро диданд».
Ҷаноби Бублик, ки тамоман ноогоҳ буданашро аз ҳодиса сахт таъкид мекард, баякбор илова намудааст, ки гӯё ӯзабкҳо миёни худ муноқиша кардаанд ва дар натиҷа яке аз онҳо кушта ва 3 нафар захмӣ гардидаст. «Ягон сокини маҳаллӣ ба ин кор алоқаманд нест»,-таъкид кардааст ӯ.

Вячеслав Бублик бо эҳсосот таъкид мекард, ки роҳрӯбон феълан бе ҳеҷ ҳарос ба кор мебароянд ва вазифаи худро иҷро карда истодаанд. Ин дар ҳоле, ки бархе шаҳрвандони Русия бо як таҳаммулнопазирӣ, ҳатто тавассути шабакаҳои иҷтимоии интернетӣ дар бораи қасосситонӣ аз мардуми омад қасам мехӯранд. Чанде пеш чеҳраи саршиноси шоубизнеси Русия Лолита Малевская зимни як барномаи «Пуст Говорят»- и Андрей Малахов ба тамоми кишвараш қасам хӯрд, то аз мардуми омади соҳаи коммуналӣ қасос хоҳад ситонд. Аммо Малевская нагуфт,ки барои кадом ҷурмашон аз мардуми омад, ки шабу рӯз кӯчаву гулгаштҳои ин кишварро аз ифлосиҳои онҳо тоза мекунанд, қасос меситонад.

Умуман чунин ба назар мерасад, ки дар ҷомеаи Русия як ҳолати инсонбадбинӣ ба миён омада истодааст ва ҳатто гуфтаҳои Владимир Путин дар хусуси он ки «агар ҳамин муҳоҷирин набошанд, Маскав дар се рӯз зери ахлот хоҳад монд» ҳам барои баъзе аз мардуми ин кишвар эҳтиромро барои мардуми омад эҷод намекунанд.
Афсӯс...

Абубакри Файзалӣ, Маскав


Шарҳи худро бинависед:

Ном:*
E-Mail:
Матни шарҳ:

Матолиби ҳамсон:

Бойгонӣ

«    Декабр 2016    »
ДушСешЧорПанҶумШанЯкш
 1234
567891011
12131415161718
19202122232425
262728293031 


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, кӯчаи Мирзо Турсунзода-45; ҳуҷраи 408

Телефон: (+992) 50 20 777 88; (44) 600 10 60; (37) 881 07 09

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!