Ҳалокати боз як ҷавони дигар дар шуъбаи пулис: Худкушӣ ё шиканҷа?
Ҷунайдулло Ҳомидов, сокини ноҳияи Вахш иддао дорад, ки маъмурини пулиси ин ноҳия писараш-Низомиддини 27-соларо дар пайи латукӯб кушта, ба онҳо гуфтаанд, ӯ худаш дар шуъбаи умури дохилӣ худро ба дор овехтааст.
Ҷунайдулло Ҳомидов дар суҳбат ба “Озодагон” гуфт, писараш шаби 30-юми март, аз толори саққобозӣ боздошт шудааст ва рӯзи дигар ду маъмури пулис бе ягон ҳуҷҷат хонаашонро мавриди бозҷӯӣ қарор дода, ба онҳо гуфтаанд , писарашон дар дуздӣ муттаҳам мешавад: “Ман чун фаҳмидам, писарам дар боздошт аст, барояш ғизо бурдам, аммо маъмурини пулис ғизоро гирифта, писарамро ба ман нишон надоданд. Субҳи рӯзи дигар бародарам аз Душанбе ба ман занг зада гуфт, ки писарат дар шуъбаи умури дохилӣ мурдааст.”
Ҳомидов мегӯяд, маъмурини пулис ба ӯ гуфтаанд, ки писараш худашро ба дор овехтааст, аммо ӯ ба ин бовар надорад: “Писарамро латукӯб кардаанд. Доду фарёди писарамро аз ошёнаи дуюми шуъбаи умури дохилӣ ҳатто сокинони назди шуъба шунидаанд.”
Ин сокини Вахш ба Марказ оид ба ҳуқуқи инсон муроҷиат карда, хостааст, барои таъмини адолат дар қазияи писараш ба ӯ вакили дифоъ диҳанд. Зебо Қосимова, ҳуқуқшиноси ин Марказ дар суҳбат ба “Озодагон” муроҷиати Ҳомидовро таъйид карда, афзуд, ки аллакай барои ӯ ҳуқуқшинос аз Қӯрғонтеппа, Қарахонов Ашӯралиро ҳамчун вакили дифоъ таъйин кардаанд. Инчунин ин сокини Вахш дар муроҷиат ба Шерхон Салимзода, додситони кулли Тоҷикистон хостааст, қазияи фавти писарро зери назорат гирад ва таҳқиқи мунсифонаи онро таъмин кунад.
Ин якумин ҳолати фавти боздоштшудагон дар шуъбаи пулиси Тоҷикистон набуда, қаблан дар Душанбе ва Суғд чунин ҳолатҳо сабт шудаанд. Аз ҷумла дар пайи боздошт аз ҷониби пулис дар ҳолатҳои мармуз Умедҷон Тоҷиев, Баҳромиддин Шодиев, Сафаралӣ Сангов ва дигарон ба ҳалокат расида буданд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |