ТАҒЙИРОТИ КАДРӢ: Бозхонди Абдуллозода ва пешниҳоди Шоҳиён ба вазифаи раиси Суди Олӣ (АКС)
Эмомалӣ Раҳмон, раисиҷумҳури Тоҷикистон Нусратулло Абдуллозода, раиси Додгоҳи олии Тоҷикистон ва муовини якуми ӯ - Маҳмудҷон Ашӯровро бо сабаби расидан ба синни нафақа аз вазифаҳояшон бозхонд карда, Шермуҳаммади Шоҳиёнро ба вазифаи раиси Суди Олӣ пешниҳод кардааст.
Ба иттилои дафтари матбуоти раисиҷумҳур Эмомалӣ Раҳмон ба Маҷлиси Миллӣ ва Маҷлиси Олии кишвар пешниҳод намудааст, ки Шермуҳаммад Шоҳиён аз вазифаи раиси Комисссияи марказии интихобот ва раъйпурсии Тоҷикистон бозхонд шавад ва таъинаш ба мақоми раиси Суди Олӣ ба тасвиб расад. Манбаъ мегӯяд, Абдулҳафиз Ашурзода, муовини якуми раиси Суди шаҳри Душанбе ба вазифаи муовини якуми раиси Додгоҳи олии кишвар пешниҳод шудааст.
Дар маҷмуъ дафтари матбуоти раисиҷумҳури Тоҷикистон афзуд, ки тибқи пешниҳоди Эмомалӣ Раҳмон аз Суди конститутсионӣ, Суди олӣ ва Суди олии иқтисодии Ҷумҳурии Тоҷикистон 19 нафар ба нафақа рухсат дода мешаванд: “Номзадии 23 кадри ҷавону корозмудаи ин соҳаҳо ба вазифаҳои пурмасъулият пешниҳод шуданд, ки аз онҳо 2 нафар ба Суди конститутсионӣ, 14 нафар ба Суди олӣ ва 7 нафар ба Суди олии иқтисодии Ҷумҳурии Тоҷикистон рост меояд”.
Манбаъ аз ҷумла таъкид кард, ки Карим Каримзода аз вазифаи судяи Суди конститутсионӣ бозхонд ва ба вазифаи муовини раиси Суди конститутсионии Тоҷикистон бозхонд шуд. Абдуллоҷон Абдуллоев бинобар сабаби расидан ба синни нафақа аз вазифаи судяи Суди конститутсионӣ бозхонд шуда, Даврон Ҳошимзода ба вазифаи судяи Суди конститутсионии Тоҷикистон, Зебуннисо Абдуллоева ба вазифаи муовини раиси Суди олии иқтисодии Ҷумҳурии Тоҷикистон ва 6 нафар судяи ҷавон, ки беш аз 5 сол дар судҳои поёнӣ таҷрибаи корӣ андӯхтаанд, ба вазифаи судяи Суди олии иқтисодӣ пешниҳод гардиданд”.
Дафтари матбуоти раисиҷумҳур илова намуд, ки инчунин ваколати муовини раиси Суди олии иқтисодии Ҷумҳурии Тоҷикистон - Мародбегим Ширинҷон ва 4 нафар судяи Суди олии иқтисодӣ бо сабаби ба синни нафақа расиданашон бозхонд карда шуданд.
Тибқи пешниҳоди дигар ваколати 7 нафар судяи Суди олии Ҷумҳурии Тоҷикистон бинобар сабаби ба поён расидани муҳлати ваколаташон бозхонд ва 6 нафар судяе, ки муҳлати ваколаташон ба анҷом расида буд, барои интихоб ба муҳлати нави судяи Суди олӣ пешниҳод гардиданд.
Эмомалӣ Раҳмон дар мулоқот бо кадрҳои пешниҳодшуда дар мақомоти додгоҳии Тоҷикистон ба Нусратулло Абдуллозода, ки аз вазифаи раиси Суди олии Ҷумҳурии Тоҷикистон ба нафақа рухсат дода шуд, барои хизматҳои бисёрсолаи арзандааш дар мақомоти судӣ ва дигар сохторҳои давлатӣ арзи сипос карда, кадрҳои ҷавони ба вазифаҳои пешниҳодшударо ба хизмати содиқонаю софдилона ва саҳмгузорӣ дар таъмини адолати судӣ дар ҷомеа даъват кардааст.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |