15 апр 2016 13:01Тоҷикистон / Иҷтимоӣ / Рӯ ба рӯ

Мастураро кӣ сӯзонд: Хоҳаршӯй ё худаш?

Раҳмоналӣ Имомзода, прокурори ноҳияи Шаҳринав мегӯяд, таҳқиқи қазияи сӯзондани Мастура Аҳмедова, сокини 26-солаи ин ноҳия феълан идома дорад.

Имомзода, имрӯз, 15 апрел дар суҳбат бо “Озодагон” гуфт, феълан бозпурсиҳо идома доранд ва қарори ниҳоие қабул нашудааст.

Дар ҳоле, ки наздикони Мастура иддао доранд, ки ӯ аз ҷониби хоҳаршӯяш Малоҳат сӯзонда шудааст, аз идораи кор бо занони ноҳияи Шаҳринав ба “Озодагон” фарзияи дигари қазияро баён доштанд. Тахмина Холматова, мутахассиси Идораи кор бо занон дар ноҳияи Шаҳринав дар суҳбат ба “Озодагон” иброз дошт, ки қазия 26 март рух додааст. Холматова, ки ба омӯзиши масъала машғул будааст, изҳор дошт, ки бар асоси иттилои мо Мастураро на каси дигар, балки худ, худашро оташ задааст: “Малоҳат, хоҳари шавҳари Мастура як рӯз қабл аз ҳодиса ба шаҳри Душанбе меояд ва вақте кормандони ШКД-и ноҳия ба ӯ занг мезананд ва мегӯянд, ки дар ин кор даст дорад, ӯ аз ҳуш меравад”.

Дар баробари ин хонум Холматова афзуд, ки як рӯз қабл аз ин ҳодиса миёни Мастура ва хоҳаршӯяш нофаҳмие шуда будааст. Манбаъ инчунин аз нофаҳмиҳои Мастура бо шавҳараш Азизов.Ш хабар дода, гуфт, ки “ин ба мо оиди шавҳараш муроҷиат карда буд, вале мо рафта корҳои фаҳмондадиҳӣ гузаронидем ва зиндагиашон хуб шуд. Аммо пас аз се-чор моҳ боз ҷангу ҷидол дар оила такрор шудааст. Он замон Мастура муроҷиат карда буд, ки шавҳараш ӯ ва фарзандонашро нигоҳубин намекунад”.

Фарзияи худсӯзӣ дар ҳолест, ки нашрияи “Оила” аз қавли Машҳура, хоҳари Мастура навиштааст, ки хоҳаршӯйи ҷабрдида пайваста барои хона бо ӯ муноқиша мекардааст. Бо навиштаи нашрия Малоҳат ғофилгирона ба сари Мастура, ки ба хобондани кӯдакаш дар гаҳвора машғул будаст, сӯзишворӣ рехта, оташ задаст. Машҳура апаи Мастура гуфтааст, давоми 15 рӯз, ки хоҳараш дар ҳолати вазнин дар беморхонаи рақами 3-и пойтахт бистарӣ аст, касе аз хонаводаи шавҳараш ба хабаргирии ӯ наомадаанд. Хонаводаи Мастура инчунин бо зикри хароҷоти зиёди табобат аз хайрхоҳон хоҳиши кӯмак кардаанд.

АКС аз cомонаи pressa.tj

Мӯҳр

Хабарҳои монанд: