24 май 2016 09:49Тоҷикистон / Сиёсат / Муҳоҷир

Life: Дар Хованск 4 тоҷикро куштаанд, 1 ҷасад гум шудааст

Вазорати умури дохилии Русия гуфтааст, иттилоъ дар бораи гум шудани ҷасади нафари 4-умро, ки гӯиё дар пайи тирпаронӣ дар қабристони “Хованское” кушта шудааст, таҳқиқ мекунад.

Хабаргузории Life аз қавли манобеяш дар мақомоти ҳифзи ҳуқуқи Русия изҳор доштааст, ки зимни муноқишаи Хованское 4 нафар кушта шудаанд: “Бар асоси хабарҳои расида, кушташудаи 4-ум низ зоҳиран шаҳрванди Тоҷикистон, марди 25-30-сола будааст, ки аз зарби тир ба ҳалокат расидааст. Ҷасади ӯро кормандони тиб, ки фаврӣ ба ҷои ҳодиса омадаанд, дидаанд. Аммо вақте пулис ҳозир шудааст, ҷасади нафари чорум дар ҷои муноқиша набудаст. Тибқи фарзияи пешакӣ ҷасади нафари чорумро наздикону ҳамватанон фавран барои гӯр кардан бурдаанд”.

Манбаъ дар шарҳи то беморхона нарасидани бархе аз маҷруҳон ва нопадид шудани гӯиё ҷасади нафари чорум, изҳор доштааст, ки эҳтимол дар нақзи қонун даст доштанд.

Сафорати Тоҷикистон дар Русия мегӯяд аз кушта шудани шаҳрванди чоруми Тоҷикистон дар қабристони “Хованск” хабар надоранд. Сарвар Бахтӣ, сухангӯйи Сафорати Тоҷикистон дар Русия имрӯз, 24 май дар суҳбат ба “Озодагон” гуфт, оид ба қазияи қабристони “Хованск” намояндаи Вазорати умури дохилаи Тоҷикистон дар Русия бо гурӯҳи муфаттишон дар тамоси доимӣ мебошад: “Агар ин хабар тасдиқ шавад, мо шуморо хабардор мекунем”.

Ҳамлаи хунин ба муҳоҷирони меҳнатии тоҷик дар қабристони Хованское 14-уми май рух дод, ки дар пайи он 3 шаҳрванди Тоҷикистон кушта ва беш аз 20 нафари дигар маҷруҳ шудаанд. Сабаби муноқиша талоши раёсати қабристон ва муштзӯрҳои мусаллаҳи чечену доғистонӣ барои ҳақситонии бештар аз муҳоҷирони тоҷик будаааст, аммо тоҷикон талабашонро рад карда, бо белу каланд зидди онҳо баромадаанд.

Мӯҳр

Хабарҳои монанд: