06 сен 2016 10:26Тоҷикистон / Иқтисодӣ

Раиси БОР дар бораи бурду бохт ва калиди рушди Тоҷикистон

Чанг Чинг Ю, раиси дафтари Бонки осиёии рушд дар Тоҷикистон мегӯяд, давоми 4 соли кору зиндагияш дар Душанбе шоҳиди бурду бохтҳои иқтисоди кишвар шудааст.

Оқои Ю дар суҳбат бо “The FINANCIAL” ислоҳот дар шароити буҳрониро роҳи асосӣ барои пешрафти Тоҷикистон хондааст. Ӯ таъкид намудааст, ки ислоҳот барои беҳбуди фаъолияти соҳибкорон пойбандӣ аз хориҷаро кам карда, боиси ташкили ҷойҳои нави корӣ мегардад.

Намояндаи доимии БОР гуфтааст, соли 2015 барои ислоҳоту ҳимояти бахши хусусӣ 60 миллион доллар равона кардаанд: “Аммо бо вуҷуди ин ширкатҳо дар Тоҷикистон ба мушкилот мувоҷҷеҳ мешаванд ва ислоҳоти минбаъда бояд бо нерӯ ва суръати бештар амалӣ карда шавад”.

Чанг Чинг Ю мушкили аслиро дар он гуфтааст, ки ширкатҳои қонунан сабтшуда бо андозҳои гарон ва шеваҳои нодурусти ҷамъоварии андоз дучор мешаванд, ки ин дар навбати худ барои афзоиши фасодкорӣ мусоидат мекунад: “Аз ҷониби дигар ширкатҳои зиёде пинҳонӣ, бе пардохти андоз фаъолият мекунанд. Инчунин корхонаҳо ба маҳдудиятҳои асъорӣ ва камбуди таъмини нерӯи барқ дар фасли зимистон мувоҷҷеҳанд”.

Намояндаи БОР таъкид намудааст, ки лоиҳаҳои ниҳодашон барои таъмини ҳаёти беҳтари одамон ва пешрафти Тоҷикистон равона шуда, бо ҳукумати Тоҷикистон дар ин самт ҳамкории хуб доранд. Ӯ афзудааст, маблағгузории БОР ба Тоҷикистон дар шакли қарз, кӯмаки техникӣ ва грант баробари 1,4 миллиард доллари амрикоӣ шуда, ин ниҳод яке аз шарикони асосии рушди Тоҷикистон ба шумор меравад.

Чанг Чинг таъкид намудааст, ки Тоҷикистон имкониятҳои зиёди нодир барои пешрафтро дорад. Ӯ аз ҷумла соҳаи гидроэнергетика, куҳкорӣ, саноати хоҷагии қишлоқ ва саёҳиро мисол овардааст: “Барои рушди устувор дар шароити омилҳои тағйирёбандаи хориҷӣ Тоҷикистон бояд, муҳаррикҳои нави рушд, аз ҷумла ҷалби бештари сармояи хусусиро роҳандозӣ кунад. Мо ба ояндаи дурахшони Тоҷикистон бовар дорем ва ҳамкориро барои амалӣ кардани зарфияту имкониятҳои ин кишвар идома медиҳем. Калиди ҳама дастовардҳо ислоҳот барои беҳтар кардани шароити кори бахши хусусӣ дар Тоҷикистон мебошад”.

Мӯҳр

Хабарҳои монанд: