21 янв 2017 14:01Тоҷикистон / Сиёсат

Гардиши нав дар қазия Хованск: Касе дар куштор айбдор нашуд

Иттиҳоми куштор алайҳи ташкилкунандагони муноқишаи Хованск, ки 14-уми майи соли 2016 бо марги се тоҷик анҷомида буд, бекор карда шудааст.

Дар ин бора Михаил Карапетян, вакили дифои яке аз муттаҳамон ба “Интерфакс” иттилоъ дода, афзуд, ки аз ҷумла иттиҳоми куштор алайҳи Юрий Чабуев, раҳбари пешини қабристони “Хованское”, Александр Бочарников, ҳуқуқшиноси ширкати “Техэнергосервис” ва Александр Бочарников, роҳбари фирории ташкилоти “"Здоровая нация" бекор гардида, ҳамаашон дар авбошӣ айбдор мешаванд: “Ронанда Миарбек Вадуев низ барои қасдан расондани зарари вазнин ба саломатӣ тибқи моддаи 111-и Кодекси ҷиноятӣ айбдор дониста мешавад”.

Ба гуфтаи Карапетян дар ҳоли ҳозир қотили бевосита муайян нашуда, тафтиши парвандаи куштор алайҳи нафари номаълум идома дорад: “Умедворем, тафтишот гунаҳкори бевосита дар кушторро пайдо хоҳад кард”.

Охири моҳи декабри соли гузашта Кумитаи тафтишотии Русия дар робита ба ин қазия 6 нафарро таҳти пайгард қарор дода буд.

Инчунин додгоҳ моҳи ноябри соли 2016 муҳлати ҳабси муттаҳамон дар қазияи Хованск- Юрий Чубаев, Сергей Козлов, Владимир Колесников, Элбек Вадуев, Никита Мошенко, Артур Ҳоҷихонов, Бочарников, Вадуев, Александр Мережко, Борис Рудаков, Вячеслав Серов, Зелимхан Хамзатханов, Элихану Яҳёев ва Леч Яҳёевро то 14-уми март тамдид карда буд.

Қаблан “Комерсант” аз қавли манобеяш навишта буд, ки барои муфаттишон то ҳол ҷузъиёти марги Суҳроб Хушаков, яке аз се шаҳрванди кушташудаи Тоҷикистон дар Хованск рӯшан нест: “Ташхиси аввалия нишон дод, ки Хушаков аз қалбаш тир хӯрда ҷон додааст. Аммо ҷасадаш на дар қабристони марказии Хованск, балки дар шимоли он ёфт шудааст, ки роҳи пиёдагард аз макони муноқиша то ҷои дарёфти ҷасад як соат вақт мегирад”.

Тибқи навиштаи “Комерсант” ташхисгари судӣ изҳори шубҳа кардааст, ки Хушакови 26-сола ба муноқишаи 14-уми май рабт дорад ва эҳтимол ӯ шаби пеш аз муноқиша кушта шудааст: “Ду нафари дигар-Ризоев Иноят Қаноатович соли таваллудаш 1977 ва Собиров Сайнуриддин Нозилович соли таваллудаш 1974 зери чархи мошини аъзои “Здоровая нация” ба ҳалокат расидаанд”.

Дар ҳоле, ки шаҳрвандони Тоҷикистон ҳадафи ҳамла қарор гирифта буданд мақомоти Русия 5 тоҷик - Бӯриев Ҳоҷиқурбон Фозилович, Чақалов Ҷомӣ Хоҷаевич, Юнусов Диловар Муҳаббатович, Аҳмадов Шоймардон Аъзамович ва Садриддинов Раҳмиддин Бадриддиновичро бо иттиҳоми авбошӣ ба ҳабс гирифта буд ва тафтишот алайҳи онҳо низ феълан идома дорад.

Мӯҳр

Хабарҳои монанд: