29 мар 2017 13:19Тоҷикистон / Иҷтимоӣ

Эълони айби ниҳоӣ ва шоҳидии яке аз муттаҳамони қазияи Хованское

Кумитаи тафтишотии Русия имрӯз, 29-уми март аз анҷоми тафтиш алайҳи 16 муттаҳам дар муноқишаи қабристони Хованское ва эълони айби ниҳоӣ хабар дод.

Тибқи иттилои дафтари матбуоти Кумитаи тафтишотӣ миёни муттаҳамон Юрий Чабуев, раҳбари пешини қабристони “Хованское”, Никита Мошенко, корманди собиқи пулиси Маскав ва Александр Бочарников мебошанд, ки алайҳашон вобаста ба саҳмашон дар ташкили бетартибиҳои оммавӣ, қасдан расонидани зарари вазнин ба саломатӣ, ки бо марг анҷомидаст, айб эълон шудааст.

Кумитаи тафтишотӣ мегӯяд, муноқишаро Юрий Чабуев ва Александр Бочарников ташкил кардаанд: “Яке аз муттаҳамон гуноҳашро иқрор кард ва шоҳидӣ дод, ки гуноҳи дигаронро низ дар ин қазия исбот мекунад”.

Бино ба иттилои муфаттишон Чабуев, Макарев ва Бочарников ин муноқишаро бо мақсади бо роҳи зурӣ берун кардани муҳоҷирони тоҷик аз қабристони Хованское ташкил намуданд.

Додгоҳ моҳи ноябри соли 2016 муҳлати ҳабси муттаҳамон дар қазияи Хованск- Юрий Чубаев, Сергей Козлов, Владимир Колесников, Элбек Вадуев, Никита Мошенко, Артур Ҳоҷихонов, Бочарников, Вадуев, Александр Мережко, Борис Рудаков, Вячеслав Серов, Зелимхан Хамзатханов, Элихану Яҳёев ва Леч Яҳёевро то 14-уми марти соли 2017 тамдид карда буд. Иттиҳоми куштор алайҳи ташкилкунандагони муноқишаи Хованск, ки 14-уми майи соли 2016 бо марги се тоҷик анҷомида буд, бекор гардида буд.

Қаблан “Комерсант” аз қавли манобеяш навишта буд, ки барои муфаттишон то ҳол ҷузъиёти марги Суҳроб Хушаков, яке аз се шаҳрванди кушташудаи Тоҷикистон дар Хованск рӯшан нест: “Ташхиси аввалия нишон дод, ки Хушаков аз қалбаш тир хӯрда ҷон додааст. Аммо ҷасадаш на дар қабристони марказии Хованск, балки дар шимоли он ёфт шудааст, ки роҳи пиёдагард аз макони муноқиша то ҷои дарёфти ҷасад як соат вақт мегирад”.

Тибқи навиштаи “Комерсант” ташхисгари судӣ изҳори шубҳа кардааст, ки Хушакови 26-сола ба муноқишаи 14-уми май рабт дорад ва эҳтимол ӯ шаби пеш аз муноқиша кушта шудааст: “Ду нафари дигар-Ризоев Иноят Қаноатович соли таваллудаш 1977 ва Собиров Сайнуриддин Нозилович соли таваллудаш 1974 зери чархи мошини аъзои “Здоровая нация” ба ҳалокат расидаанд”.

Дар ҳоле, ки шаҳрвандони Тоҷикистон ҳадафи ҳамла қарор гирифта буданд мақомоти Русия 5 тоҷик - Бӯриев Ҳоҷиқурбон Фозилович, Чақалов Ҷомӣ Хоҷаевич, Юнусов Диловар Муҳаббатович, Аҳмадов Шоймардон Аъзамович ва Садриддинов Раҳмиддин Бадриддиновичро бо иттиҳоми авбошӣ ба ҳабс гирифта буд ва тафтишот алайҳи онҳо низ феълан идома дорад.

Мӯҳр

Хабарҳои монанд: