29 янв 2015 10:29Тоҷикистон / Иҷтимоӣ / Тема дня

Эълони афви фирориён ва пешниҳоди сабукӣ ба аскарон (ВИДЕО)

Зариф Ализода, омбудсмен ва ё Ваколатдор оид ба ҳуқуқи инсон дар Тоҷикистон имрӯз, 29-уми январ зимни нишасти матбуотӣ дар Душанбе гуфт, ҳанӯз ҳам масъулин зимни ҷалби наваскарон ба хидмати ҳарбӣ ба қонуншиканӣ роҳ медиҳанд.

Ализода гуфт, ҳарчанд ҳолатҳои қонуншиканӣ кам шудаанд, аммо ҳанӯз комилан бартараф нагардидаанд: “Соли гузашта якчанд ҳолате буд, ки бо дахолати мо сарпрокуратураи ҳарбӣ корҳои ҷиноятӣ оғоз кард. Аз ҷумла ҳамон ҳодисае, ки дар Панҷакент шуд, бисёр ташвишовар аст.”

Омбудсмени тоҷик афзуд, барои ҳавасманд кардани наваскарон ба хидмат баъзе пешниҳодҳоро ироа кардаанд: “Пешниҳод кардем ба афроде, ки хизмат кардаанд, имтиёз дода шавад. Ин таҷриба дар дигар кишварҳо ҳам аст. Аз ҷумла зимни дохилшавӣ ба донишгоҳҳои олӣ, кор дар мақомоти қудратӣ ва дигар имтиёзҳо дода шаванд. Мо талош мекунем, ки ин пешниҳодҳо мавриди амал қарор гиранд.”

ВИДЕОИ суҳбати омбудсмен дар бораи даъват ба хидмати ҳарбӣ

Инчунин Ализода эълон кард, ҷавононе, ки то ҳол ба далели фирор аз хидмати ҳарбӣ дар пайгарди қонунӣ қарор доштанд, дар доираи татбиқи қонуни афв аз ҷавобгарӣ озод шудаанд: “Бисёри онҳо дар Русия ҳастанд ва барои он, ки зимни бозгашт боздошт нашаванд метавонанд бо худ ариза барои афвро гиранд ва ба мақомот пешниҳод кунанд. Дар ин сурат боздошт нахоҳанд шуд.”

Ин дар ҳолест, ки ҳамасола дар мавсими даъвати баҳору тирамоҳ Тоҷикистонро “облава” фаро мегирад. Аз ҷумла дар мавсими гузаштаи даъват волидони Саидалӣ Ҳақбердиеви бистучорсола аз деҳаи Яккахонаи ҷамоати Рӯдакӣ изҳор доштанд, ки бар асари латукӯби кормандони Комиссариати ҳарбии шаҳри Панҷакент, фарзанди онҳо ҷароҳатҳои гуногун бардошта, дар ҳоли бехудӣ дар беморхона бистарӣ шуда буд. Чунин қазияҳо зимни даъват ба хидмати ҳарбӣ дар мавсимҳои гузашта низ зиёд ба қайд гирифта шудаанд.

Мӯҳр

Хабарҳои монанд: