Дашномдиҳии “дӯстонаю шӯхиомез” бо куштор анҷомид
Додгоҳи вилояти Суғд Мирзоалӣ Мирзоев, сокини 34-солаи маҳаллаи Дўстии ҷамоати Палдораки ноҳияи Мастчоҳро барои қатли ҳамдеҳааш ба 15 соли зиндони низомаш сахт маҳкум кардааст.
Ба иттилои манбаъ қазия, дар пайи дашномҳои ба истиллоҳ “дӯстона ва шӯхиомез”, ки миёни бархе аз сокинони кишвар одат шудааст, аввали соли равон рух додааст: “Мирзоев Мирзоалӣ барои харидорӣ намудани тамоку ба мағоза рафта, дар назди мағоза шиносаш Холбеков Ҳабибуллоро вомехӯрад, ки тоза аз муҳоҷирати меҳнатӣ баргаштааст. Пас аз салому алейк, бе ягон бадбинию ғараз чун одати пешин шўхиомез Ҳабибулло ва Мирзоалӣ ҳамдигарро дашном доданд”.
Додгоҳ мегӯяд, вақте Ҳабибулло хоҳари Мирзоалиро дашноми қабеҳ кард, ҳамсўҳбаташ ба ғазаб омада, бо корди кисагиаш ба гурдаи чапи Ҳабибулло зарба зад: “Аз чунин ҳамла ҷабрдида тозон ба мағоза даромада, аз соҳиби он Саидакрам Ҳасанов ёрӣ пурсид. Мирзоалӣ бошад, бо овози гўшхарош аз соҳиби мағоза хоҳиш кард, ки Ҳабибуллоро дошта истад. Вале Саидакрам аз чунин оҳанги имдодталабонаи Ҳабибуллову фарёдзании Мирзоалӣ тарсида, аз мағоза баромада, ҷониби нуқтаи сўзишворӣ шитофт, то ин ки Ҳоҷӣ Сангинов ва Саидғиёс Саидовро барои ёрмандӣ даъват намояд.
Дар дохили мағоза бошад, Мирзоалӣ Ҳабибуллоро то аз пой афтидан корд зада, пасон ҷониби хонааш рафт. Вай дар роҳ ҳамсояаш Шералиро дида, бо телефони мобилии ў ба рафиқаш – корманди милитсия Фахриддин Мерганов занг зада, ба ҷинояти содиркардааш иқрор шуд”.
Ба иттилои манбаъ дар ҳамин ҳол Ҳабибуллои маҷруҳ аз Саидғиёс Саидов, ки бо ҳамроҳии Саидакрам ва Ҳоҷӣ Сангинов омада истода буданд, хоҳиш кард, то ӯро ба беморхона баранд: “Аммо дар роҳ бар асари захмҳои бардоштааш ва хунравии зиёд ҷон додааст”.
Додгоҳи вилояти Суғд таъкид намуд, ки Мирзоев Мирзоалӣ дар мурофиа пушаймонияшро баён доштаааст ва додрас бо назардошти ҳамаи омилҳо, аз ҷумла ихтиёрӣ таслим шудан ва фарзандони ноболиғи Мирзоалӣ, ӯро ба 15 соли зиндони низомаш сахт маҳкум кардааст.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |