Як крани борбардор ду даҳсола боз бойиси дарди сари мардуми Кӯлоб шудааст. Гуфтанист, ин «фанноварии кӯҳнаи ҳамешапойдор» дар болои релсҳо, дар шафати беморхонаи вилоятӣ 20 сол побарҷо истода, хатар ба беморхона ва иншооти дигари ҳамсоя эҷод мекунад.
Алишер Кабиров, сардухтури беморхонаи мазкур мегӯяд, соле пештар даҳҳо маротиба ба таври шифоҳӣ ба шаҳрдорӣ, ба кумитаи ҳолатҳои фавқуллодаи шаҳрӣ ва ҳам минтақавӣ муроҷиат кардаанд, вале касе дар ин мақомот ба арзашон нарасидааст. Ахиран, дар ҳукумати шаҳр гуфтаанд, ки: «Чӣ даҳонӣ шикоят мекунед, ба таври расмӣ муроҷиат кунед, баъд масъаларо ҳал мекунем».
Аввали соли равон, дар моҳи январ маъмурияти беморхона бо мактуби расмӣ ба райиси ҳукумати шаҳри Кӯлоб Ҳамид Абдуллоев, баъдан ба сардорони кумитаҳои ҳолатҳои фавқуллодаи шаҳрӣ ва минтақавӣ шикоят бурда дархост намудаанд, то дар мавриди бардоштани «борбардор»-и хатарзо кӯмак намоянд. Кабиров мегӯяд, баъди як ё ду моҳ кормандони кумитаи ҳолатҳои фавқуллодаи гурӯҳи шаҳру навоҳии Кӯлоб мавзеи қарордоди борбардорро дида, муайян намуданд, ки дар ҳақиқат крани солҳо боз бекорхобида ба касалхона таҳдид мекунад: «Ваъда доданд, ки дар кӯтоҳтарин муддат ин борбардорро аз шафати беморхона хоҳанд гирифт. Вале бо гузашти 1 сол дигар ягон масъул аз ин мақомот, аз «бало»-и сари беморон овезон ёд намекунад».
«Имоми Аъзам» ҳам дар хатар
Ҳамин борбардори бузурги тақрибан 20-метраи сарбафалак моли ширкати «Кӯлобсоз» буда, аз охири солҳои 80-уми асри гузашта дар маркази шаҳр бекор «хоб» асту роҳбарони ширкат ба касе иҷозат намедиҳанд, ки онро канда, аз хатари чаппа шудану зарар ба иншооту беморонхонаву беморон ва одамон мерасидаро пешгирӣ намоянд. Воқеан, дар беморхона ҳамарӯза садҳо беморон барои ташхис меоянду садҳо нафари дигар ин ҷо бистарӣ будаву муолиҷа мегиранд. Вале гумон меравад, ки дар ҳукумати шаҳр ё зӯри касе ба соҳибмулк намерасад ва ё парвои беморхонаву беморон надоранд.
Табибон бошанд ба ин ақидаанд, ки то замоне роҳбарияти шаҳр ва кумитаҳои ҳолатҳои фавқуллодаи шаҳриву минтақавӣ иваз нашаванд, хатари «кран» ҳамоно боқӣ хоҳад монд.
Дар ҳамин ҳол, барои намозхонони масҷиди «Имоми Аъзам» низ ҳамин гуна хатар таҳдид мекунад. Дар саҳни ин масҷид, ҳанӯз нимаи солҳои 80-уми асри 20, ки лоиҳакашиаш шурӯъ шуда буд, як крани дигари бузург бекор «хоб», аммо «рост» истодааст. Маврид ба ёдоварист, сохтмони масҷид на танҳо ба таъхир, балки пурра қатъ гаштааст ва крани бадвоҳима манзараи ғамангези масҷидро боз ҳам шигифттар ҷилва медиҳад. Ин дар ҳолест, ки ҳар рӯзи ҷумъа садҳо нафар ва рӯзҳои ид ҳазорон нафар аз мӯъминон барои намозгузорӣ ба ин масҷид омада, зери ҳамин «борбардор» намоз мегузоранд. Аммо масъулин бо шумули мулло Ҳайдар Шарифзода, имом-хатиби ин масҷид ва шаҳрдорӣ низ аз ин хатар парвое надоранд...
Аслиддин Достиев
Мӯҳр« Апрел 2024 » | ||||||
---|---|---|---|---|---|---|
Душ | Сеш | Чор | Пан | Ҷум | Шан | Якш |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 |