08 май 2014 15:29Тоҷикистон / Сиёсат

Роҳи бастаи Ворух, сафари Қодирӣ ва ба таъхир уфтодани музокироти тоҷикону қирғизҳо

Сокинони рустоҳои Бодканд дар пайи занозании шаби 7 май, ки бо захмӣ шудани даҳҳо тан анҷом ёфт, роҳи Ворух-Исфараро, ки аз қаламрави Қирғизистон мегузарад, бастаанд. Расонаҳои қирғизӣ менависанд, дар ҳоли ҳозир танҳо барои мошинҳои борбар иҷозаи гузаштан будаасту бас.

Дар ҳамин ҳол, бино ба хабари як манбаи мо аз ҳукумати Исфара Абдураҳмон Қодирӣ, раиси вилояти Суғд ба маҳалли ҳодиса сафар кардааст. Мусоҳиби мо мегӯяд, қарор аст, имрӯз мақомоти интизомии Тоҷикистону Қирғизистон иллатҳои сар задани задухӯрди сокинон ва, инчунин, хисоротеро, ки дар пайи он ворид шуд, баррасӣ намоянд.

Ҳоло аз ҷониби Қирғизистон Абдураҳмон Маматалиев, муовини нахуствазир ва Кирсан Асанов, муовини вазири умури дохилии Қирғизистон дар марз будаанд. Гуфта мешавад, яке аз ноибҳои вазири умури дохилии Тоҷикистон низ барои баррасии қазия ба марз рафтааст.

Дар ҳамин ҳол, Абдураҳмон Маматалиев дар суҳбат бо расонаи “tushtuk.kg” гуфтааст, дар робита ба ин задухурд бо ҳамтоёни тоҷикаш суҳбати телефонӣ анҷом дода, мақомоти Душанбе низ ҷонибдори таҳқиқи одилона ва мунсифонаи он мебошанд: “Мақомоти қудратии ҳар ду кишвар ҳам дар алоҳидагӣ ва ҳам дар якҷоягӣ таҳқиқ доранд.”

Маматалиев сабаби ба миён омадани задухурдҳои марзиро ба таври кофӣ баргузор нашудани мулоқотҳои мақомоти ҳар ду кишвар бо сокинони назди марзӣ хондааст. Ӯ гуфта, ҳоло бояд барои густариш наёфтани ин таниши марзӣ мулоқоти дуҷонибаи Душанбею Бишкек сурат гирад. Муовини сарвазири Қирғизистон аз таъхирёбии ҷаласаи гуруҳҳои кории ду кишвар оид ба масъалаи марзӣ хабар дода, гуфтааст, ин мулоқот ба рӯзи 13 май гузошта шудааст.

Ин дар ҳолест, ки қарор буд, 11 майи соли ҷорӣ дар Душанбе музокироти гуруҳҳои кории Тоҷикистону Қирғизистон оид ба масоили марзӣ баргузор гардад. Баҳсҳои марзӣ миёни Тоҷикистону Қирғизистон баъд аз тирпаронии 11 январи соли ҷорӣ дар Хоҷаи Аълои Исфара, ки тарафи марзбонҳои тоҷику қирғиз ҳашт захмӣ боқӣ гузошт, доғ гардиданд.

Мӯҳр

Хабарҳои монанд:

Санчар.

Ман саволе дорам ба хукуматдорони точик..Чаро мо точикон наметавонем рохи онхоро бастан..Аз канори дехаи Хочаи Аъло марзи Точикистонро бурида шохрохи Ош-Исфана мегузарад ..Модомеки киргизо рохи Ворух-Исфараро баст биёед мо хам ин рохро мебандем кани бинем чи ин хамсояи ноодам боз ба чи хулоса меояд!!Ё ин,ки мо аз ин мардум ягон чои тарс дорем ё ин,ки карздорем...Як рахме ба мардум кунед аз барои Худо.!!

Ҷавоб диҳед Иқтибос Шикоят

Эзоҳ илова кунед