24 дек 2014 16:51Хабарҳои ҷаҳон

Журналисти олмонӣ: Танҳо сунниҳо метавонанд ҷилави ДИИШ-ро бигиранд

Юрген Ҳофер, як рӯзноманигори олмонӣ, ки даҳ рӯзи худро дар манотиқи таҳти тасарруфи гуруҳи террористии “Давлати исломӣ” сипарӣ кардааст, мегӯяд, танҳо сунниҳои миёнарав метавонанд, ҷилави ДИИШ-ро бигиранд.

Ин рӯзноманигори олмонӣ тамоми бардоштҳои худро дар саҳифаи Фейсбук дар 7 қисмат хулоса кардааст. Ӯ дар яке аз ин қисматҳо мегӯяд, “барои тавзеҳи ин масъала бояд гуфт, шаҳри Мавсили Ироқ 3 миллион аҳолӣ дорад ва он аз сӯи 5 ҳазор ҷангҷӯи ДИИШ идора мешавад. Барои аз байн бурдани ин созмони террористӣ бояд тамоми шаҳри Мавсилро бо куштани миллионҳо нафар ба хок яксон кард. Маҳсули бомбборонҳо дар Ховари Миёна ҳамеша тавлиди терроризм будааст. ДИИШ маҳсули бомбборонҳои ғайриқонунии Ҷорҷ Буш дар Ироқ аст. Танҳо сунниҳои миёнарави Ироқ ҳастанд, ки метавонанд, ДИИШ-ро мутаваққиф созанд. Ҳамон амале, ки дар соли 2007 анҷом доданд. Агар битавон дубора сунниҳоро вориди сохтори сиёсии ҷомеаи Ироқ кард, онҳо қодир хоҳанд буд, ҷилави ин созмони террористиро бигиранд. Дар Сурия ҳам роҳҳалҳое вуҷуд дорад, вале Ғарб бояд дар сиёсатбарории худ дар онҷо таҷдиди назар кунад”.

Дар қисмати дигар мегӯяд, ҳар рӯз ба сафи ин гуруҳи терористӣ ҳудуди 50 нафар аз кишварҳои гуногун мепайвандад, ки миёни онҳо намояндагони тамоми қишрҳо ҳастанд: “Ман ду рӯзро дар як анбори ДИИШ дар наздикии марзи Туркия сипарӣ кардам. Ҳар рӯз беш аз 50 тан довталабона барои пайвастан ба ДИИШ вориди онҷо мешуданд. Ин афрод на ашхоси дилмондаю ноумед, балки шахсиятҳои муваффақ низ миёни онҳо дида мешуд. Бисёре аз онҳо шахсиятҳои муваффақи амрикоӣ, бритониёӣ, русӣ, олмонӣ, ва фаронсавию дигар ҳастанд. Яке аз ин довталабон чанд ҳафта пеш аз пайвастанаш ба ДИИШ имтиҳони ҳуқуқи худро супорида буд, ки соҳиби мадраки ваколат аз яке кишварҳои Ғарб гардида буд. Аммо ӯ ҷанг дар сафи ДИИШ-ро “беҳтар” аз ваколати худ медонист”.

Мӯҳр

Хабарҳои монанд: