26 июн 2014 13:40Оcиёи Марказӣ / Узбакистон

Иқтисоддон: Зани президент миллиардҳо ҷамъ овардааст

Шермамат Абдуллозода, корманди пешини Вазорати молияи Узбакистон гуфтааст, ҳамсари Ислом Каримов миллиардҳо ҷамъ овардааст. Ин нуктаро ӯ дар як мусоҳиба ба торнамои Uznews.net изҳор доштааст.

Абдуллозода, ки соли 2004 ҳамроҳ бо хонаводааш ба ИМА кӯч баст, афзуда, ки “худи Каримов дар қасри раёсатҷумҳурӣ ройгон зиндагӣ мекунад. Пулҳояшро дар ҳисобҳои бонкӣ нигоҳ медорад. Ӯ Ислом Каримов аст, на Гулнора Каримова, ки комёбиҳояшро ба намоиш гузорад. Вай зиррак аст, пас хеле доно”.

Дар мавриди дороиҳои духтарони Ислом Каримов ин иқтисоддон афзуда, ки танҳо манзили Лола Каримова дар ИМА наздики $50 миллион арзиш дорад. “Андози солонаи ин хона 105 ҳазор доллар мешавад. Бар илова ҳақмузди хидматгорон, муҳофизон... Солона барои нигоҳдории он 500 ҳазор доллар сарф мешавад. Барои чӣ ман ин маблағҳоро ҳисоб мекунам? Барои он ки Лола Каримова дар ин манзил аз ҳами зиёд рухсатияшро мегузаронад. Хонаи аслии ӯ дар Швейтсария 50 миллион доллар нарх дорад. Бо назардошти ин дар ҳисобҳои бонкии ӯ чандин миллиард доллар аст. Ва ин танҳо як духтари Каримов. Гулнора ҳам аз ин камтар нест ва дӯст дорад, ки дар қиёс ба хоҳараш Лола, дороиҳояшро намоиш бидиҳад”,-илова кардааст Шермамат Абдуллозода.

Ба гуфтаи ин иқтисоддон, вай аз сиёсати молии Узбакистон изҳори норозигӣ кард ва аз ин рӯ дар он кишвар истодан барояш хатар дошт. "Агар аз кишвар берун намешудам, ҳоло дар боздоштгоҳи Хадамоти амният будам. Маро дар паҳн кардани маводи мухаддир, амалиётҳои молиявӣ ё ҳамдастӣ бо исломгароён ва омодагӣ ба амалҳои террористӣ муттаҳам мекарданд",-гуфтааст вай.

Мӯҳр

Хабарҳои монанд: